من كام يوم كنت بتمشي في النت لقيت واحد بيسأل وبيقول: يا ترى إحنا لسة بنحب مصر ؟؟؟!!!
قبل ما تندفع وتقول طبعاً دى مصر هى أمى ونيلها هو دمى وتكلمنى عن شهامة ولاد البلد وأخلاق بنت البلد وبنات وسط البلد .. خلينا نتكلم بواقعية شوية يا ترى يا جماعة مصر بتمثل لكل شاب فينا إيه .. يا ترى ذكرياتك الحلوة فيها أكتر ولا الوحشة ؟؟؟
مصر بلدنا اللى اتحولت الحياة فيها لمعاناة مستمرة من أول ما تفتح عينيك الصبح لحد ما تغمضها باليل .. تنزل الصبح من البيت ويبدأ الصراع .. صراع مع سواق الميكروباص وصراع مع ركاب الميكروباص .. صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع .. سيبك طبعاً من صراع غض البصر اللى غالباً بتخسر فيه لأنك ممكن تخبط فى عامود نور وأنت ماشى عشان مبقاش ينفع تبص غير فى الأرض ...
مصر اللى مبقاش فيها حاجة صح لا تعليم ولا صحة ولا إسكان ولا أخلاق .. مصر اللى الشرطة فيها بتقهرنا وأصحاب رأس المال بيستعبدونا وأسألوا إللي شغاليين في القطاع الخاص .. مصر اللى شعبها من كتر الهم والجوع اتكونت عنده عقد نقص وكراهية ضد الأخرين .. مصر اللى كتر فيها الإجرام وبدل شهامة ولاد البلد .. بقى تحرش الولاد بالبنات فى وسط البلد .. مصر اللى تخاف على بنتك ومراتك وأختك يمشوا لوحدهم فى الشارع خايف عليهم من 1000 خطر .. تحرش وسرقة وإغتصاب وسفاح المعادى ورخامة أمناء الشرطة وغلاسة ولاد البلد .
شايفين بلادنا بقيت عاملة إزاى يا جماعة ؟؟؟!!!
محدش يفهم إنى عايز أقول إنى بكره بلادى أو بحرض على كراهيتها .. أبداً والله أنا بفضفض عشان أنا نفسي مبقيتش فاهم .. شايفين كل البلاوى اللى فى مصر دى ؟!!!
بس برغم كدة حد فينا حاسس إنه بيكره مصر ؟!!!
بردو لأ ..
طيب مصر دى إيه حكايتها ؟!!!
أنا حاسس الإحساس ده وعارف انكو كلكوا حاسين نفس الإحساس .. كل ما أحاول أكرهها ميهونش عليا أقولها .. كل ما أفكر إنى أهاجر وأطفش منها قلبى مايطاوعنيش إنى أتخيل حتى مع ذلك متوقع إن ده ممكن يحصل في يوم لو استمر الحال على كده .. كل ما أتخانق مع سواق ميكروباص .. اقابل راجل طيب مبتسم قاعد جمبى فلا أملك إلا الإبتسام .. كل ما أتقزز من أفعال الشرطة ومن التعامل معاهم .. أقع فى ظابط ابن ناس أوى ومحترم وألاقيه بيعامل الناس كويس وبكل إحترام .. كل ما أفتكر مشاكل سواقين التاكسى أركب مع سواق تانى راجل بركة يدعيلى ويطبطب عليا .. كل ما أتخنق من البنات الكاسيات العاريات أقابل بنت محترمة جداً ومتدينة وعلى خلق أوى .. أقول الحمد لله الدنيا بردو بخير .. كل أما أشوف العراق واللى بيحصل فيها وأتخيل إن ده ممكن يحصل لمصر أحس بألف شوكة فى قلبى وأحس إن الدم بيغلى فى عروقى وعايز أقف على حدودها وأموت ألف مرة دفاعاً عن بلادى .....
يا جماعة أنا بجد مش فاهم .. يا ترى جيلنا ده بيحب مصر ولا لأ ؟!!!
واحد يرد عليا يفهمنى هو أنا لوحدى إللى متعذب فى حب وكراهية البلد دى ولا ده إحساس جيلنا كله ؟!!! تعالو نواجه نفسنا ونجاوب عالسؤال ده: يا ترى إحنا لسة بنحب مصر ؟!!!
ولا إنتمائنا بس في الكورة ؟!!!
هناك ٤ تعليقات:
حلو اوى يا هانى انك فى وسط زحام الحياة تقف وتسال نفسك وتسألنا سؤال ذى دا " ياترى احنا لسة بنحب مصر؟" بي انا شايفة إن الموضوع أكبر من إننا نسأل نفسنا عن حب مصر ! القضية بقت أكبر من مصر القضية بقت فينا كابنى آدمين ياترى احنا لسة بنعرف نحب أصلاَ؟ لسة فينا شئ بيعرف يحب ويكره ويحس ولا بقينا مجرد ألالات اتعودت تشتغل وتتحرك وتفكر بطريقة معينة وخلاص وكدا لغاية ما تموت , احنا بنحب إية فى حياتنا؟ بنؤمن بإية فى حياتنا ؟ بنتمى لإية فى حيانتا؟ احنا لينا قضية؟ لينا هدف وإتجاه واحد ؟
للأسف إحنا أصبحنا مشتتين " مش مركزين" عايشين وخلاص عشان عايشين ولازم نكمل , بس نكمل ازاى واحنا راضين عن دا ولا لا مش مهم ودا اللى خالانا لا لينا هدف ولا لينا قضية حتى ما بقناش نعلاف نحب ونكره ونتمسك ونحارب ونؤمن بحاجة أو بحد, تفتكروا لية إحنا كدا؟,
وبالنسبة لمصر وحبها فما أظنش أن فى حد بيفكر فى موضوع حبها دا أصلا حتى لو وقف وسال نفسه عنه مش حيعرف يجاوب , عارفيين لية لأنه قبل ما يجاوب على السؤال دا المفروض عليه يجاوب على 100 سؤال الاول وللأسف كلهم ما لهمش إجابات.
أهلاً حنين ..
متشكر جداً على ردك الجميل، وبالنسبة لحب مصر إحنا بنحبها لكن بنكرة سلبياتها، ساعة ما واحد يقول إنا بكرة البلد دي يبقي مش قصدة مصر، يبقي يقصد الروتيب والسلبيات والبلاوي إللي بنشوفها في حياتنا كل يوم.
لكن صدقيني ساعة ما هيكون فيه أزمة هتلاقيهم جمب بعض بيموتوا عشان البلد دي...
أهم حاجة يكون فيه قيادات صاحية ومبتسرقش.. البلد فيها خير كتييييييييير قوي بس للأسف زي ما بيقولوا خيرها لغيرها..
الخير مش للشعب ودي المشكلة ...
مرة تانية شاكر لك مرورك ويا رب دايماً تعليقاتك منور البلوجر.
هاني ضوَّه
للأسف الشديد ياهانى كل الى هيحاول يعلق على الموضوع ده هيكون تعليقه نابع من أحد المنطلقين التاليين :-
الاول : أن أحنا العيب فينا وأننا فقدنا وطنيتنا ومقدرتنا على الحب أصلا.
الثانى : أن مصر نفسها مافيهاش حاجه تتحب أو أنها فقدت رونقها إلي الواحد يشوفها فيه أحسن شىء فى الوجود.
أما أنا أود توضيح أن لى رأى مخالف لذلك كله ألا وهو؟
مصر ليست حكومة فقط أو ناس فقط أو مبانى فقط أو مصانع فقط ولكلا عيوبه ومساؤه التى لا يمكن التغاضى عنها
ولكن يبقى السؤال حائرا لماذا لا يستطيع أى منا أن يكره مصر السر وراء ذلك يكمن فى التركيبه الربانيه العجيبه للشخصية المصريه التى تتجمع فيها صفات كثيره-متناقده-حسنة-سيئه- سلبيبه-إيجابية عند وضع كل هذه الصفات فى وعاء الطهى وأغلاقه وإحكام ستجد الشخصية الناتجه من هذه المعادلة الأخلاقية المستحيلة التنفيذ تتسم بالتالى:
1- شخصية كسولة فى حالة الرخاء.
2- شخصية نشطة جدا فى حالة الضغط
(أيا كان نوع الضغط).
3- شخصيه ناقمة على ما حولها فى المجتمع
أيا كانت الظروف.
4- ............
5- ............
عفوا لقد وجدت نفسى سوف أقضى يومى كاملا فى سرد صفات هذه الشخصية الخرافية لذا فكرت فى أختصار سهل وسلس لصفاتهاألا وهو:
(شخصية مناقضه للأوضاع من
حولها أيا كان الوضع)
هنا فقط يكمن السر لا يوجد هراهيه للبلد نفسها وإن كان هناك شىء من ذلك فنحن الذى إدعاه , صحيح أن هذا الادعاء قائم على المعاناة التى نعانيها كل منا فى برنامجه اليومى لذا يجعل منه سببا لكراهيته لهذه البلد الذى هو أصلا مايملكش فى قلبه مثقال ذرة منها.
أسف للتطويل.
أحمد جنديه
أول حاجه انا عايز اقولها ياجماعه أنو انتو مش عارفيين قيمة البلد الي انتو عايشين فيها أنا أحمد من سوريا درسة فمصر وقعدت فيها مايقارب الخمس سنين وعشت مع اهلها واكلت من أكلها وشربت من نيلها واديني بحنلها من بعد متركتها واللهي ياجماعه مصر بخيير وأنا مسمحش لحد يتكلم عن مصر ولا كلمه وعلى العموم أحمدو ربكم على البلد الجميله دي وربنا يحفضها لكم ويخليها بخير .للتواصل على إيميلي dreey2002@hotmail.comوشكرا.
إرسال تعليق